ഭഗവാൻ

 അന്നൊക്കെ  ഹൌസ് സർജന്റെ പ്രധാന പണി  ചോര വലിക്കുകയായിരുന്നു. വാർഡിൽ അഡ്മിഷൻ  ആയ ആളുകളുടെ രക്തം  സിറിഞ്ചിൽ വലിച്ച്  ചെറിയ കുപ്പികളിലാക്കി  ലേബൽ ഒട്ടിച്ച്  ബൈസ്റ്റാൻഡറുടെ കൈയിൽ ലാബിലേക്ക് കൊടുത്തു വിടുക,  റിപ്പോർട്ട് കിട്ടുമ്പോൾ  കേസ് ഷീറ്റിൽ ചേർക്കുക. കേസ് ഷീറ്റ് പൂർത്തിയാക്കുക. പിന്നെ ഓരോ ദിവസവും  ഡിസ്ചാർജ് ആയിപോകുന്ന ആളുകളുടെ ഡിസ്ചാർജ്  കാർഡ് എഴുതുക.  സർജറി , ഓർത്തോ വാർഡുകളിൽ ആണെങ്കിൽ  മുറിവുകളുടെ ഡ്രസിങ് ചെയ്യുക. മൂത്രം പോകാൻ കത്തീറ്റർ ഇടുക . സ്വന്തമായി തീരുമാനമെടുത്ത്  എന്തെങ്കിലും ചെയ്തിരുന്നത് കേഷ്വാലിറ്റികളിൽ  മാത്രമായിരുന്നു.   പി ജി വിദ്യാർത്ഥികളുടെയും  സാറന്മാരുടെയും മേൽനോട്ടത്തിൽ .

സർജറി നടക്കുന്ന ദിവസങ്ങളിൽ പോലും വാർഡിൽ ഒരു പാട് പണിയുണ്ടാകാറുണ്ടായിരുന്നു.  തീയേറ്ററിൽ തന്നെ രോഗിയെ സർജറിക്ക്  എടുക്കുന്നതിനു മുമ്പ് പല കാര്യങ്ങളും ചെയ്യാനുണ്ടായിരുന്നു.   ടെസ്റ്റുകളുടെ റിസൾട്ട്  സംഘടിപ്പിച്ച് വെക്കുക.  രക്തം വേണ്ട രോഗികൾക്ക് അത് സജ്ജമാക്കുക.  ചില മരുന്നുകൾ പുറത്ത്  നിന്ന്  എത്തിക്കുക എന്ന് തുടങ്ങി.  കേസുകൾ അസിസ്ററ്  ചെയ്യാൻ  ചിലർക്ക് ഭാഗ്യം കിട്ടും.    എനിക്ക് താല്പര്യമിലാത്ത കാര്യമായിരുന്നു    പക്ഷെ കത്തിയെടുക്കാൻ  വലിയ താല്പര്യമുള്ളവരും ഉണ്ടായിരുന്നു. 

ഞങ്ങളുടെ ഒരു സർജറി ദിവസം   ദിവസം രാവിലെ  എത്തി  , ഡ്രസ് മാറ്റി , തിയേറ്റർ ഡ്രസ് ഇട്ട് തിയേറ്ററിൽ എത്തി.  എത്തിയ ഉടനെ ആരോ എന്നെ ഒരു പണി ഏൽപ്പിച്ചു . കൃഷ്ണൻ എന്ന രോഗിയുടെ  ബ്ലഡ് പരിശോധനാ റിസൾട്ട് ,  പുറത്തുള്ള  കൂട്ടിരിപ്പുകാരുടെ കൈയിൽ നിന്ന്  വാങ്ങിക്കൊണ്ട് വരണം.  ഞാൻ പോയി  തിയേറ്റർ കോംപ്ലക്‌സിന്റെ  വാതിൽ തുറന്ന്  അവിടെ ഇരിക്കുന്ന  ആളുകളോട്  വിളിച്ച് ചോദിച്ചു - ''കൃഷ്ണന്റെ  കൂടെയുള്ള ആളുണ്ടോ ?''

പെട്ടെന്ന് മറ്റൊരു  ഹൗസ് സർജൻ പുറകിൽ നിന്ന് അവിടെ പെട്ടെന്ന് പ്രത്യക്ഷപ്പെട്ട്  ഉറക്കെ വിളിച്ച് ചോദിച്ചു - " ഭഗവാന്റെ കൂടെയുള്ള  ആളുണ്ടോ ?'

ആളുകൾക്ക് ആദ്യം പിടി കിട്ടിയില്ല . പിന്നെ ചിരിക്കാൻ തുടങ്ങി.  ഭഗവാൻ  എന്ന പേരുള്ള  ഉത്തർ പ്രദേശ് കാരൻ  രോഗിയുടെ സർജറി അന്ന് നടക്കുന്നുണ്ട് . അയാൾക്ക്  ബ്ലഡ് എത്തിയിട്ടുണ്ടോ എന്നാണ്  അറിയേണ്ടത്.    ഹിന്ദി അറിയാവുന്ന സെക്യൂറിറ്റിയുടെ സഹായത്തോടെ  പ്രശ്‍നം  പരിഹരിച്ചു .  അവസാനം  ചങ്ങാതി തിയേറ്ററിലേക്ക്  തിരിഞ്ഞപ്പോൾ വീണ്ടും ചിരി.  മൂപ്പരുടെ   വസ്ത്രത്തിന്റെ പുറകിൽ വലിയൊരു തുളയുണ്ടായിരുന്നു ..

ഓർമ്മകൾക്കെന്ത്  സുഗന്ധം എന്ന മട്ടിൽ ഓർത്തതല്ല.  അന്നത്തെ ആ ഹൌസ്  സർജനെ ഓർത്തു . എന്റെ ബാച്ചിലെ ആളായിരുന്നില്ല.  എങ്കിലും ഒരുമിച്ച്   പല  വിഭാഗങ്ങളിലും   പോസ്റ്റിങ്ങ് ഉണ്ടായിരുന്നു . സുഹൃത്തായിരുന്നു . നല്ലൊരു മനുഷ്യൻ  ആയിരുന്നു.   കുറച്ച് കാലത്തിനു ശേഷം ഈ ലോകം വിട്ടു പോയി.