ഞാൻ അത് എങ്ങനെ വരക്കാൻ നോക്കിയിട്ടും ശരിയാകുന്നില്ല . ഒരു മൈക്രോസ്കോപ്പ് വരക്കാനാണ് . മിക്കവരെയും പോലെ പോലെ ഡോക്ടറാകാനാണ് സെക്കൻഡ് ഗ്രൂപ്പ് എടുത്ത് പ്രീഡിഗ്രിക്ക് ചേർന്നിരിക്കുന്നത് . ആദ്യത്തെ ആഴ്ച ബോട്ടണിയിലെ ഒരു സാറ് വന്ന് ഞങ്ങളെ ലബോറട്ടറിയിലേക്ക് തെളിച്ചു . ഒരു കൂട്ടർ സുവോളജി ലാബിലേക്കും പോയി.
മൈക്രോസ്കോപ്പ് ആണ് ആദ്യത്തെ ക്ലാസിൽ . മൈക്രോസ്കോപ്പിന്റെ ഭാഗങ്ങൾ സാർ വിശദീകരിച്ചു തന്നു. ഒരു ചെടിത്തണ്ട് വെട്ടി അതെങ്ങനെ മൈക്രോസ്കോപ്പിൽ പരിശോധിക്കണമെന്ന് കാണിച്ചു . അവസാനം റെക്കോർഡ് ബുക്കിൽ ഒരു മൈക്രോസ്കോപ്പ് വരച്ച് അടുത്തയാഴ്ച സമർപ്പിക്കാൻ പറഞ്ഞു .
ഞാനിത് എങ്ങനെ നോക്കിയിട്ടും നടക്കുന്നില്ല. അവസാനം ഞാൻ നാട്ടിലെ ഒരു ചിത്രകാരനെ സമീപിച്ചു . എന്റെ സുഹൃത്ത് കൂടെയാണ് .എന്റെ ആവശ്യം പറഞ്ഞതും മൂപ്പർ സമ്മതിച്ചു . ഞാൻ മൈക്രോസ്കോപ്പിന്റെ പടമുള്ള പുസ്തകവും റിക്കോർഡ് ബുക്കും അങ്ങേരെ ഏൽപ്പിച്ചു .
ചങ്ങാതി ഒറ്റ ദിവസം കൊണ്ട് വർക്ക് പൂർത്തിയാക്കി . സംഗതി തിരിച്ച്‌ തന്നു. മൈക്രോസ്കോപ്പ് നോക്കിയപ്പോഴാണ് , വളരെ കലാത്മകമായി വരച്ചിട്ടുണ്ട് . സുന്ദരമായ ചിത്രം . പക്ഷെ അതിന്റെ ഐ പീസ് ലെന്സുകളും ഒബ്ജക്ടീവ് ലെൻസും ഒബ്ജക്റ്റുമെല്ലാം വേറെ വേറെ ദിശകളിലേക്കാണ് . അതിലെ നോക്കിയാൽ ഒന്നും കാണാനിടയില്ല.
എന്തായാലും ഞാൻ റെക്കോർഡ് ബുക്കുമായി സാറിന്റെ അടുത്ത് പോയി .. " എടോ , ഞാൻ തന്നോട് ടെലസ്കോപ്പ് വരക്കാനല്ല, മൈക്രോസ്കോപ്പ് വരക്കാനാണ് പറഞ്ഞത് .. ഇത് മാറ്റി വരച്ചു കൊണ്ട് വാ.. " എന്നും പറഞ്ഞ് എന്നെ ഓടിച്ചു . സംഗതി ശരിയാണ് . അതിന്റെ ഐ പീസ് നേരെ ആകാശത്തേക്കാണ് നോക്കുന്നത് .
ഞാൻ വീണ്ടും സുഹൃത്തിന്റെ അടുത്തേക്ക് വിട്ടു. ഒരു ലെന്സിലൂടെ നോക്കിയാൽ മറ്റേ ലെൻസ് വഴി കാണണം . നേരെ നേരെ ആയിരിക്കണം . ചങ്ങാതി കാര്യങ്ങൾ മനസിലാക്കി , നല്ലൊരു പടം വരച്ചു തന്നു .
അതുമായി സാറിന്റെ അടുത്ത് പോയപ്പോൾ ശരിയിട്ടു തന്നു എന്ന് മാത്രമല്ല , ഗുഡ് എന്നും എഴുതി തന്നു.
No comments:
Post a Comment