സർജൻ

  ' തോളിൽ ചെറിയൊരു മുഴ - ' ഡിഗ്രിക്ക് പഠിക്കുന്ന  കോളേജ്  കാരൻ പയ്യൻ  സർജനെ കാണിക്കാൻ പോയതാണ് .

'' കുഴപ്പമില്ലാത്തതാണ് . പതുക്കെ ചെയ്‌താൽ മതി . പിന്നീട് ചെയ്യാം - ''  ഡോക്ടർ അവനെ അറിയിച്ചു .

''പോരാ .. ഇപ്പോൾ തന്നെ ചെയ്യണം . ആ  തടിപ്പിൽ  കറുത്ത ഒരടയാളമുണ്ട് .  അത് വഴി അടുത്ത വീട്ടിലെ ആൾ തന്റെ രഹസ്യങ്ങൾ ഒക്കെ ചോർത്തുകയാണ് ..പ്രശ്നമാണ് "

ഡോക്ടർ  രണ്ട് ദിവസം കഴിഞ്ഞ്  സർജറി ചെയ്തു . അവനെ  വീട്ടിലേക്ക് വിട്ടു .

രണ്ടാഴ്ച കഴിഞ്ഞ്  ചങ്ങാതി വീണ്ടും സർജന്റെ അടുത്ത് എത്തി . സർജറി ചെയ്തപ്പോൾ  ഡോക്ടർ അതിനകത്ത്  ഒരു ചിപ്പ് നിക്ഷേപിച്ചിട്ടുണ്ടെന്നാണ്  ഇയാൾ ആരോപിക്കുന്നത് . ആ ചിപ്പ് വഴി   ശത്രുക്കൾ  തന്റെ നീക്കങ്ങൾ ചോർത്തുന്നു..അതിൽ നിന്ന് തരംഗങ്ങൾ പുറത്തേക്ക് പ്രസരിക്കുന്നുണ്ട് . വലിയ എടങ്ങേറാണ് ..

ഡോക്ടർ ചിപ്പ് എടുത്ത് കൊടുക്കാനൊന്നും നിന്നില്ല.  നേരെ ഒരു സൈക്യാട്രിസ്റ്റിന്റെ അടുത്തേക്ക് വിട്ടു .

സർജനെ തല്ലണം എന്നാണ് ഇവൻ പറയുന്നത്.  പ്രശ്‌നം  മാനസികമാണെന്ന് പയ്യന്റെ പിതാവിന്  മനസ്സിലായിട്ടുണ്ട് . പക്ഷെ അയാൾ ധരിച്ചിരിക്കുന്നത്  സർജറിക്കിടെ  പ്രധാനപ്പെട്ട ഒരു ഞരമ്പിന്  തകരാറു പറ്റിയെന്നും അത് കൊണ്ടാണ് ഈ കുഴപ്പങ്ങൾ ഉണ്ടായതെന്നും. 

ഹാലോപെരിഡോൾ  ഗുളികകൾ ആണ്  സർജനെ തല്ലു കിട്ടുന്നതിൽ നിന്നും രക്ഷിച്ചത് എന്ന് തോന്നുന്നു. 

സർജൻമാർ കുഴപ്പം പിടിച്ച ഒരു ജീവിതമാണ് ജീവിക്കുന്നത്  .  ഏത് വഴിക്കാണ്  ഗുലുമാലുകൾ വരുന്നത് എന്ന് പറയാൻ പറ്റില്ല.